Pap nangko salrikuengama?

Papni ning·ao ong·ode

Bible text- Toe. 16:9; 3:5-7; Mark 1:15; Rom 12:2.

Pagchakna- Ezekiel 36:26 “Gital ka·tong......aro gital gisikko Anga na·simangni ning·o dongen, Aro na·simangni be·enoniko ro·ong gita dakgipa ka·tongko anga ra·angen.....”

Skia poraianichi, Gisik senganichi, changa sapanichi ba kingkot jotton ka·anichi mande an·tangko niksengatna man·a indiba uarang mamung dakeba paponiko naljokatna bil dongja. An·ching paponi maikai chegen mingsa nangchongmotgipa bi·ani gnang.

Da·alo an·ching bi·anio minggni pointrangko skie ra·gen uaranga

1.       Gisikni sikani (namgijana)

2.       Bewal (namgijagipa)

Banga Kristianrangan ia minggnini gisepo jajaako man·a. Isolo bi·on an·tangtangni namjabatsrangipa gisikni (pap ka·na) sikaninabate an·tangtangni bewalko dingtangatchina bi·a. Iani gimin aganengon bi·nabe inede ong·ja, Bi·bo indiba namgijana sikatgipa gisikkosa skang.

Saksa me·chikma indake bi·engachim, “Gitel ka·sapai chingoni gu·angsringrangko gimatpabo.”  Dingtangako man·kujana kingking ua bi·angkuaha. Je gita bi·oba ua uko talatkamna man·jaha. Uni gimin Salsao segipa indake bi·skaha, “Gitel ka·sapai ia Gu·angko gimaatsrangbo.” Badiagipa ja·pang?

An·chingba pangnan indake dakronga maina salantion Gu·angko so·otanipal Gu·angsringkosa dokrokaia. Gu·angko so·otani miksonganide papni ja·pangko dingtangatani jean pap ka·na sikani.

Saksa Gary minggipa mande gnangchim ua Pamong saksana re·bae aganaha, “Pamong, angade chu ringako watna manjaenga, Pringoba attamoba anga chukosa pangnan nangaia, chu gride mamungkon dakna sikja, anga namen watnade jotton ka·pahachim, anga Isoloba chu ringaniko watna bi·pahachim (Gary an·tangni bewalko dingtangatchina bi·enga)  indiba man·jaenga na·a maiba watani  cholko agangenma?” Unon Panong aganchakaha, “Re·ange, Chuko nangsrangjachina bi·bo.”  Gary uako dakna chanchiahachim indiba chanchipiltaiaha, “anga indake bi·ode kusi ong·e dongnan mansrangjawaha, maina angara ringachisa kusi ong·e dongenga.”

Niate nibo iandake dakani a·selsa mandeara papni ning·aoni ong·katna man·jaenga maina Isolni ra·galako nangnikja, an·tangni kusi-kon am·pila. An·chingni bi·aniara Gilja noko, Noko tusina skang, chakatna skang, mi cha·na skang aro Saani somoio, (etc) bi·na nanga indakesan ong·ja. An·chingni bi·na nanganiara ong·gnina bi·anisachim jekai Obostana skang aro Pap ka·na skang, nangko da·on maikoba namgijako dakatna sikatengahaode, uako dakatna skangan bi·boha. Iako gisik nange dakgenchimode na·a pap ka·genchima?

Uni gimin dakmajoao napjana gita bi·genchimode namgijako dakatna sikatgipa gisiknasa mongsongbate bi·na nanga maina iasa mandeo namgijani ja·pang ong·a. Uni gimin an·ching Isolo iako an·chingoniko ra·galchina bi·na nanga, Isol an·chingko dakchakgen.

Isolara Namgija gisikni sikanikosan mangmang dingtangataigenma?

Isol Mandeoni nangija gisikni sikaniko dingtangatahaode, mandeni bewalba bikan dingtanggen. Isol Namgija gisikni sikanikoba aro Bewalkoba dingtangatna dakchaka. Maikai?

Mitam manderang minggnikon Isolni dingtangatanikon nanga, indiba mande an·tangkon on·kanga dongjaode mamung dakeba man·jawa, maina bewal an·chingnisa. Na·simang saniba Cigaret ringako manderangni ku·sikoniko Salgioni ong·onbae Jisuni ra·e uni ku·sikoniko galeako nikama? Na·simang manderangni namgija dakako, a·brerangni beng·ako knahama? Isol namgija gisikni sikaniko nang·oniko dingtangatgen na·a nang·ni bewalko dingtangatskana man·gen. Isol aganja, “Anga nangna namgipa gisikko on·aha na·a dingtangataibojok”.  Iako dakna nanganio Isol galchipaigen ine ong·ja. Philippirangna 4:13 o indake agana, “Angko bilakatgipao anga pilakkon dakna ama.” Iano watata Paul an·chingni bewalni gimin aganenga, maikai? Pilakkon, banggijako ong·ja indiba gimikkon, uni ortode pilak papkon jekon ong·na amgijakoba, sani bilchi? Uni bilchi ba Jisuni bil on·anichi, Uni ortode Isol an·chingni bewalko dingtangatna man·a gita an·chingna bilko on·chaka.

Uni gimin ka·sara ripengrang an·ching Isolni ong·atgimin ong·e skatang gimaatako man·jana, Isolni ong·atgimin ong·e Una an·tangtangni janggitangko on·pilskana. An·ching bang·a changon duk ong·aona soka na·a chanchie niahama maini gimin? Haida an·chigni bi·an gadangona sokujaniba ong·naba gnang.  An·ching niatna Abrahamni Cannanona re·angani, Isol Abrahamna aganaha, “ Kaldia oni Urona, songko noko watange, manderagko watange Angni mesokgni a·songona re·angbo A·bachenga 11:31; 12:1 (Isol Abraham baksa dongniko miksongenga). Urko watangaha ua bachi re·angenga uko u·ija. Uara bano? Isol uko aganjawa, Uni ortode Abraham re·chengna nanggen Uko dakosa Isol Dilgen Chu·soksrangna gitade Isolan dilgen indiba an·ching dakchengna nangen. Sundareko niko uona re·ange nibo uko nikjawa, uni gimin Isol nangko angko dilchongmotgen.

Ripengrang nang·ko aro angko papona salanggipara namgijagipa gisiksa uni gimin namgijagipa gisikko nang·oniko ra·galchina Isolna pakwatbo, maina na·a, ba anga, uko galna amja. Uni gimin na·a Namgijagipa Bewalo ba namgija Gisikni sikanio ong·genchimoba Isolan an·chingko dingtangatna dakchakgen. Mikrakbo aro bi·bo.

Isol na·simangna Patichina.

                                Mittela.