PAP KU·RACHAKANI

An·chingni paprangko ku·rachakna nangchongmota

Kema ka·ako man·bo.

"An·tangni niam pe·aniko pindapgipa silrorojawa, indiba ku·rachake uarangko watgalgipasa ka'sachakako man gen" (Toe Ski.28:13).

Isolni ka·sachakaniko man·na gitade altuabea aro dabianirang gri. Pap kema ka·ako man·atna gita Gitel an·chingni rakbee maikoba dakaniko dabija. Niam pe·anina, Ua an·chingko chelbee songreani aro be·entangko saknaatanirangko dakatja. Indiba jean paptangko ku·rachake ua papko watgala uan ka·sachakaniko man·gen.

Watata saksa indake agana, "Unigimin saksa sakgipinna paptangtangko ku·rachakgrikbo, aro saksa sakgipinna bi·grikbo maikai na·simang an·senggen" (Jakob 5:16). kema ka·na man·gipa Isolna na·simangni paprangko ku·rachakbo, aro saksa sakgipinna nang·ni dakgual daksretanirangna kemako bi·bo. Na·a nang·ni ripengna ba songsulna gisik saataniko dakahaode nang·ni namgijanina kemako bi·bo, aro ua nang·ko kusi ong·been kema ka·na nanga. Uni ja·manode nang·ni papko kema ka·china na·a Isolo bi·na nanga, maina nang·ni gisik saatgipa jongadara Isolni mande ong·a, aro uko gisik saate na·a Isolna pap ka·aha. Nang·ni dosko an·chingni Dal·gipa mol·molchakgipa Kamal Dal·gipaona ra·baa, Uan an·ching gita dakmajoanirangko man·ahaoba mamung pap ka·jaha, aro an·chingni bilgrianirangna simsaka, aro Ua pilak papni dakrangko rongtalatna man·a.

Je manderangan bamja aro an·tangtangni papko Isolni mikkangona ra·baja uamang Isolni nikanio ra·chakaniko man·na skanggipa dakna nanganikon dakkuja. An·ching papna duk man·na sikjaode aro gisik ka·bee paptangtangko ku·rachakjaode, papna mitchijaode an·ching Isolo tom·tomaniko man·kuja. An·ching pap kema watako man·gijani a·sela an·ching ka·tongtangtangkon bamatja aro bebeni katta baksa melie janggi tangjani giminsa ong·a. Jinmaoba ong·bo, saksanba ong·bo pap kema bi·on gisik ka·tong gimikchi papko parake kema bi·na nanga. Pap kema bi·anio simsakgija jebasi dakani ong·ja ba papna mitchigijagipa saniba draatako man·ani giminsa dakaiani ong·ja. Gisik ka·tong gimikchi pap kema bi·anio Isolni agansokpilgija ka·sachakani donga. Gitko segipa indine agana: "Jihova be·tonggimin ka·tong gnanggiparangni sepango donga, aro gisik bnekgimin ong·giparangko jokata" (Git 34:18).

Chong·motgipa pap kema bi·anio dingtangmancha papko minge bi·ani donga. Uarang Isolnasan mangmang aganna nangani ong·naba donga; uarang saniba gisikko saatahani gimin gisik saa man·giparangni mikkango ong·naba donga ba uarang jinmana aganna nanggiparang ong·naba donga. Indiba pilak pap kema bi·anirango ua ka·gimin papko ma·teke minge kema bi·na nanga. Samuelni salrango Israelrang Isoloni re·brangaha, uamang an·tangtangni papna dukko chakengachim; maina uamangni Isolo bebe ra·ani gimaaha. Uamang Uni bil aro u·ianichi uamangko sason ka·aniko ma·sijaha, aro Isolni uamangko chelchakna amaniko uamang nikjaha. Uamang a·gilsak salgisakko sason ka·gipani sason ka·aoni an·pile uamangni samtangtangchi dongenggipa a songrangko sason ka·a gita ka·atpana skaha. Uamang tom·tomaniko man·na skangan uamang indine minge pap ku·rachakaha, Chinga rajako bi·ara chingni pilak paprangni kosako ia namgijako dapataha." Je papkon uamang ka·aha ine u·iaha, ukon minge uamang pap ku·rachakaha. Uamangni mitelpilgijanian uamangni janggiko duk man·ataha, dongenggipa a·songrangko Gisik ka·tong gimikchi gisik pil·jaskalde aro namdapaniko dakjaskalde Isol pap kema bi·aniko ra·chakjawa. Janggitanganio dingtangatanirang dongna nanga: je jekon Isol mitchia uarangko chel·atna nanga. Papna duk ong·bebeaonisa ia kam ong·gen. An·ching dakna nanganiko rongtalen an·chingna mesokaha: Na·simang su·srangbo, na·simang an·tangtangko rongtalatbo, angni mikronni mikkangoniko na·simangni dakanirangni namgijako chel·atbo, namgija dakako dondikbo, name dakna skiako ra·bo; bichalko am·bo, oniako man·gipako dakchakbo, pagrigipako bichal ka·bo segrigipana (mokordomao) jegrikchakbo" (Isaia 1:16,17). "Denggugipa bondok ra·ako on·pilode, uni ra·seke ra·giminko on·pilode, mamung namgijako dakgija janggini sea niamrango re·ruraode ua tangchongmotgen, ua sijawa" (Ezekiel 33:15). Gisik pil·ani kamni gimin Paul indine sea: "Maina iakon, chong·motan Isolni gita ua jajrenga man·atako nibo, ua badita bimchipa, bate badita an·tangna balchake agana, bate badita namnikjapila, bate badita kena, bate badita sikbea, bate badita bimchipa bate badita jakbikpilako ong·ataha. Pilakkon ua kamo na·simang rongtala ong·a ine an·tangtango mesokaha'" (2 Kor. 7:11).

            Jensalo mandeni cholonko pap siataha unon namgijako dakgipa an·tangni namgijako u·ijaha, ba an·tangni papni namgijakon u·ijaha; aro Gisik Rongtalgipani bilna an·tangko pakwatjaskalde, ua an·tangni papon ka·na ong·e dongkuaia. Uni gisik pil·anirang gisiko nange gisik pil·anirang ong·ja. Pap mingantinan ua maiaba pa·sikaniko on·a, maiaba obosta ong·jaode iako ba uako dakjawachim ine ua an·tangni dosna ua warachaka.

Jensalo Adam aro Hoba beng·gimin bolni biteko cha·ahaon uamang kratcha·an aro kengokan gapaha. A·bachengode uamang an·tangtangni papna pa·sike aganna chanchie, sina rai on·gnioni jokna jotton ka·aha. Papni gimin sing·on Adam Isolko aro uni jora ripengko dos gale aganaiaha, "Na·a je me·chikko ang baksa dongchina ine on·aha, uan ua bolni biteko angna on·aha, unon anga cha·aha." Me·chik chipuko dos gale indine aganskaaha, Chipu angko tol·napaha, unon anga cha·aha." Na·a maina chipuko ong·ata? Na·a uko maina Edenona napna on·a? An·tangni papni a·sel ua Isolko ia sing·anirangchi Isolko an·tangtangni ga·akanina dos galpilaha. An·tangni dosko ipake galania tol·ani pagipaoni a·bachengaha, uko da·o an·ching Adamni depante aro demechikrango nikengkua. Pap ku·rachakon indake pa·sike agananirangko agane ku·rachakaianiko Isol ra·chakjawa. Chong·motgipa pap ku·rachakanio mamung tol·napani aro cha·chipilani gri. Kajina gilgipa gita ua salgichiko nigitona pa·gija, "Isol angna papina ka·sachakbo," ine ua bi·gen aro an tangni papko indake parakgiparangkosa kema ka·gen, maina unon Jisu ua gisik pil·gipani palo An·tangni an·chichi mol·molchakgen.

An·tangni papna pa·sike agangija, an·tangko dos griate agangijagipa bame bebe ong·e pap ku·rachakgiparangko Isolni kattao mesoka. Paul an·tangni gimin warachake pa·sike aganjaha, ua an·tangni papna pa·sike agangijaan indine aganaha, "Anga .... bang·a rongtalgiparangko patoko chipachim, aro pilak pilnipil saja on·e uamangko kal·stapchina draatachim, aro uamangko namen ka·o nangani gimin anga a·paloni songjinmarangona kingking a·rikataha" (Watata 26:10,11). Ua indine aganna jajajaha, "Papirangko jokatna Jisu a·gilsakona re·baaha. Uamangoni ong·batgipa" (1 Tim. 1:15). gilja nokrango uamangko angan (papi) ong·batgipa.

               

               Bamao ka·bee gisik pil·chong·motgipa mande Isolni ka·saaniko aro Skobikrokni damko gamchatnikgen, aro degipani ka·sagipa pagipana dostangko agana gita papna gisik pil·chongmotgipa mande an·tangni pilak paprangko Isolni mikkangona ra·bagen. Indake sea gnang, "An·ching an·tangtang papko ku·rachakode an·chingni paprangko watna aro pilak toromi ong·gijanirangoniko an·chingko rongtalatna Ua bebegipa aro toromigipa ong·a" ( 1 Johan 1:9).

              Isol Na·simangna Patichina.